Ye sab Tumhara Karam Hai Aaqa Ke Baat Ab Tak Bani Hui Hai

Koi saleeqa hai aarzoo ka na bandagi meri bandagi hai

Ye sab tumhara karam hai aaqa ke baat ab tak bani hui hai

Kisi ka ehsan kyun uthayein kisi ko halaat kyun bataayein

Tumhin se maangein ge tum hi do ge tumhare dar se hi lo lagi hai

Tajalliyon ke kafeel tum ho muraad-e-qalb-e-khalil tum ho

Khuda ki roshan daleel tum ho ye sab tumhari hi roshni hai

Tumhin ho rooh-e-rawaan-e-hasti sakoon nazar ka dilon ki masti

Hai do jahan ki bahaar tum se tumhin se phoolon mein taazgi hai

Shaoor o fikr o nazar ke daave hadd-e-taayun se barh na paaye

Na choo sake in bulandiyon ko jahan maqaam-e-Muhammadi hai

Nazar nazar rehmat-e-saraapa ada ada gairat-e-Masihha

Zameer-e-murda bhi jee uthe hain jidhar tumhari nazar uthi hai

Amal ki mere asaas kya hai bajuz nadamat ke paas kya hai

Rahe salamat tumhari nisbat mera to ek aasra yahi hai

Ata kiya mujh ko dard-e-ulfat kahan thi ye pur khata ki qismat

Main is karam ke kahan tha qabil huzoor ki banda parwari hai

Unhin ke dar se Khuda mila hai unhi se is ka pata chala hai

Woh aaeena jo Khuda numa hai jamaal-e-husn huzoor hi hai

Basheer kahiye nazeer kahiye unhein siraaj-e-muneer kahiye

Jo sar basar hai kalaam-e-Rabbi woh mere aaqa ki zindagi hai