Yar-e Chaman Mein, Baith Lab Ju, Durood Parh

Yar-e chaman mein, baith lab ju, durood parh

Kar yaad, phool dekh ke woh roo, durood parh

Har saans waro salli ala say mehakti aaye

Jannat bana rahay tera har soo, durood parh

Khali na jaye koi bhi pal un ke zikr se

Jitna bhi waqt tujh ko mile tu, durood parh

Zanjeere hayat! hum aaghosh-e waqt ho

Phaila sadae noor ke bazu! durood parh

Dehleez-e noor aankh mein rakh us hareem ki

Sar ko jhuka ke ae dil-e khush khoo! durood parh

Kunj-e lahad se bagh-e jann tak rahe gi saath

Hai khaas is durood ki khushboo! durood parh

Un ki janab mein sar-e tasleem, kham rahay

Din ho ke raat, qalb-e raza ju! durood parh

Doori mein reh ke kaif-e huzoori naseeb ho

Woh, jis mein ho Owais (RA) ki khushboo, durood parh

Yeh soch, tujh ko kaun si naimat mili, Riaz

Aankhon mein la ke shukar ke aansu, durood parh