Yā Raḥmatā Lil-‘Ālamīn
Yā Raḥmatā Lil-‘ālamīn
Yā Raḥmatā Lil-‘Ālamīn
Ilhām, jāma hai terā
Qur'ān, ‘imāma hai terā
Minbar terā, ‘Arsh-i Barīn
Yā Raḥmatā Lil-‘Ālamīn
Ā'īna-i Raḥmat badan, sānsen, chirāgh-i ‘ilm o fan
Qurb-i Ilāhī, terā ghar, al-faqr fakhrī, terā dhan
Khushbū terī, jouy-e karam
Aankhen terī, bāb-i ḥaram
Nūr-i azal, terī jabeen
Yā Raḥmatā Lil-‘Ālamīn
Teri khamoshī bhī azān, nīnden bhī terī ratjage
Teri ḥayāt-i pāk kā, har lamḥa paighambar lage
Khair al-bashar, rutbah terā
Āwāz-i ḥaq, khuṭbah terā
Āfāq, tere sā ma‘īn
Yā Raḥmatā Lil-‘Ālamīn
Qabzah terī par chā'ein kā, bīnā'ī par idrāk par
Pairoṅ ki janbish khāk par, aur āhaṭeīn aflāk par
Gard-i safar, tāroṅ ki zaw
Mirkab, Barāq-i tez raw
Sā'is, Jibrīl-i Amīn
Yā Raḥmatā Lil-‘Ālamīn
Tū āftāb-i gār bhī tū parcham-i yalgār bhī
‘Ajz-o wafā bhī pyār bhī, shahzūr bhī sālar bhī
Teri zara‘ah, fatḥ o zafar
Ṣidq o ṣafā, terī sipar
Teigh o tabar, ṣabr o yaqīn
Yā Raḥmatā Lil-‘Ālamīn
Phir gudriyō ko la'l de, jān patharō mein ḍāl de
Hāwī hon mustaqbil pe ham, māzī sā ham ko ḥāl de
Da‘wā hai terī chāh kā
Is ummiyat-i gumrāh kā
Tere siwā kō'ī nahīn
Yā Raḥmatā Lil-‘Ālamīn