Woh Sooye Laalah-zaar Phirte Hain
Woh Sooye Laalah-zaar Phirte Hain
Woh sooye laalah-zaar phirte hain
Tere din ae bahaar phirte hain
Jo tere dar se yaar phirte hain
Dar badar yoon hi khwaar phirte hain
Aah kal aish to kiye hum ne
Aaj woh be-qaraar phirte hain
Un ke eema se dono baagon par
Kheil-e-lail o nahaar phirte hain
Har charaagh-e-mazaar par qudsi
Kaise parwana waar phirte hain
Us gali ka gadaa hoon main jis mein
Maangte taajdaar phirte hain
Jaan hain jaan kya nazar aaye
Kyun adoo gird-e-ghaar phirte hain
Phool kya dekhun meri aankhon mein
Dasht-e-Tayyibah ke khaar phirte hain
Laakhon qudsi hain kaam khidmat par
Laakhon gird-e-mazaar phirte hain
Wardiyan bolte hain harkaray
Pehra dete sawar phirte hain
Rakhiye jaise hain khaana-zaad hain hum
Maula ke aib-daar phirte hain
Haaye ghaafil woh kya jagah hai jahan
Paanch jaate hain chaar phirte hain
Baayen raste na jaa musaafir sun
Maal hai raah maar phirte hain
Jaag sunsaan ban hai raat aayi
Gurg bahr-e-shikaar phirte hain
Nafs yeh koi chaal hai zaalim
Jaise khaasay bijaar phirte hain
Koi kyun poochhe teri baat Raza
Tujh se kutte hazaar phirte hain