Woh Kamal-e-Husn-e-Huzoor Hai Ke Guman Nuqs Zari Nahi
Woh Kamal-e-Husn-e-Huzoor Hai Ke Guman Nuqs Zari Nahi
Woh kamal-e-husn-e-Huzoor hai ke guman nuqs zari nahi
Yahi phool khar se door hai yahi shama hai ke bujhi nahi
Mere haal se woh hain ba-khabar koi baat un se chupi nahi
Mujhe aur nar ka khauf ho, nahi ji nahi, nahi ji nahi
Woh nazar hai kaisi nazar ke jo rukh-e-Mustafa pe jami nahi
Woh zaban kaisi zaban hai ke jo waqf zikr-e-Nabi nahi
Wohi ramz-e-kul, wohi raaz-e-kul, wohi sarr-e-kul wohi noor-e-kul
Wohi jaan-e-kul wohi shaan-e-kul ke Habib un sa koi nahi
Hain wohi Khalil ki ilteja hain wohi Kaleem ka mudd'a
Hain wohi Masih ka mojza, yeh sifat kisi ko mili nahi
Jo Khuda ne rutba inhe diya kisi aur ko nahi mil saka
Kisi aur ne yeh nahi kaha mere baad koi Nabi nahi
Hain wohi Ameen-e-Kalam-e-Rabb, hai inhein ki milk mein sab ka sab
Wohi kainaat ka hain sabab, jo wohi na hon to yahi nahi
Wohi hain Muhammad-e-Mustafa jinhain Rabb ne apne liye chuna
Woh kamal-e-husn ata kiya ke kahin bhi koi kaji nahi
Balaghal ulaa bi-kamaalihi, kashafaddujaa bi-jamaalihi
Hasunat jamiau khisaalihi koi aaya un sa Nabi nahi
Inhein Rabb ne ilm ata kiya inhein Shah-e-sidq o safa kiya
Inhein bahr-e-jood o sakha kiya, koi shay utha ke rakhi nahi
Woh Habib-e-Rabb-e-ula huye woh Shafi-e-roz-e-jaza huye
Woh ameem-e-jood o ata huye, koi khoobi un se bachi nahi
Diye un ki milk mein do jahan, kiya un ko sarwar sarwaraan
Inhein ilm-e-kawn o makan diya ke ata-e-Rabb mein kami nahi
Wohi tajdar-e-haram huye wohi gham gussar-e-ajam huye
Wohi reh numaye umam huye ke misaal-e-Mustafavi nahi
Woh jo dushmanon ko panaah dein woh jo zalimon ko duaein dein
Jo bagher maange ata karen, koi un ke misl sakhi nahi
Yeh karam hai Rabb ka Habib par, kiya un ka zikr-e-azeez tar
Jo na bhejain un pe durood hum to ada namaz hui nahi
Kabhi un ko dekha jo khwab mein, hua gum unhein ki janab mein
Main bataun kaise ke kya hua, nazar un ke rukh pe jami nahi
Kya zikr-e-Malik ein o aan, padhi naat-e-sarwar-e-do jahan
Yahi keh rahe hain sabhi yahan ke hamari pyaas bujhi nahi
Yeh woh pyaas hai jo bujhe nahi yeh woh zikr hai jo ruke nahi
Yeh hai ishq-e-Ahmad-e-Mujtaba ke utaar is ka koi nahi
Inhein main ne apna bana liya, inhein apne dil mein bitha liya
Kisi aur se mujhe kya gharz, mere paas koi kami nahi
Yeh Raza ki ruh ka faiz hai ke qalam ko mere zubaan mili
Sabhi keh rahe hain yeh bar-mala ke hamari pyaas bujhi nahi
Inhein apna jaisa bashar kaha, bara bhai jaisa bana diya
Bara badguman hai Najdiya koi is se barh ke shaqi nahi
Hai ghulam Nazmi Huzoor ka hua kyun aseer gham o bala
Meri aankh aap ko chhod kar kisi aur par to jami nahi