Tum Par Mein Lakh Jaan Se Qurban Ya Rasool ﷺ

Tum par mein lakh jaan se qurban ya Rasool ﷺ

Bar aaein mere dil ke bhi armaan ya Rasool ﷺ

Kyun dil se mein fida na karun jaan ya Rasool ﷺ

Rehte hain is mein aap ke armaan ya Rasool ﷺ

Kushta hun roye paak ka niklun jo qabr se

Jari meri zabaan pe ho Quran ya Rasool ﷺ

Duniya se aur kuch nahi matloob hai mujhe

Le jaaun apne saath mein imaan ya Rasool ﷺ

Is shauq mein ke aap ke daaman se ja mile

Mein chaak kar raha hun garebaan ya Rasool ﷺ

Kaafi hai ye waseela shafaat ke waaste

Aasi to magar hun pashemaan ya Rasool ﷺ

Mushkil kusha hain aap ameer aap ka ghulaam

Ab is ki mushkilein bhi hon aasaan ya Rasool ﷺ