Tu Shah-e-Khubaan, Tu Jaan-e-Jaanan, Hai Chehra Um-ul-Kitab Tera

Tu Shah-e-Khubaan, tu Jaan-e-Jaanan, hai chehra Um-ul-Kitab tera

Na ban saki hai, na ban sake ga, misaal teri jawaab tera

Tu sab se awwal, tu sab se aakhir, mila hai husn-e-dawam tujh ko

Hai umr laakhon baras ki teri, magar hai taaza shabaab tera

Khuda ki gherat ne daal rakhe hain tujh pe satar hazaar parday

Jahan mein ban jaate Toor laakhon jo ek bhi utta hijab tera

Ho mushk o anbar, ya bu-e-jannat, nazar mein us ki hai be haqeeqat

Mila hai jis ko, mila hai jis ne paseena rashk gulaab tera

Main tere husn o bayaan ke sadqay, main teri meethi zubaan ke sadqay

Ba rang-e-khushbu dilon pe utra hai kitna dilkash khitaab tera

Hai tu bhi Sa'im ajeeb insaan ke khauf mahshar se hai haraasaan

Are tu jin ki hai naat parhta wahi to lain gay hisaab tera