Tu Ooj-e-risaalat Hai, Shah-e-khair-ul-umam Hai
Tu Ooj-e-risaalat Hai, Shah-e-khair-ul-umam Hai
Tu ooj-e-risaalat hai, shah-e-khair-ul-umam hai
Tu woh hai ke zeeba jise har jaah o hasham hai
Khaaliq ne banaya tujhe har cheez ka maula
Konain ki har shay teri mamnoon-e-karam hai
Idraak mein kis tarah samaaye teri azmat
Har rif'at-e-aflaak tera naqsh-e-qadam hai
Goonjay hain zamane mein tera ism-e-giraami
Qaaim hai tu is naam se kuch apna bharam hai
Aane se tere door hue zulm ke saaye
Tu adl ka, insaaf ka lehrata alam hai
Khaaliq ne sikhaya mujhe madhat ka saleeqa
Mahboob-e-do aalam ki ata mera qalam hai
Zinda hai jo is ahd par aashob mein Naqvi
Yeh teri dua hai, teri nazar, tera karam hai