Subha Tayba Mein Hui Batt'ta Hai Baara Noor Ka
Subha Tayba Mein Hui Batt'ta Hai Baara Noor Ka
Subha Tayba mein hui batt'ta hai baara Noor ka
Sadqa lene Noor ka aaya hai taara Noor ka
Baagh-e-Tayba mein suhaana phool phoola Noor ka
Mast-e-boo hain bulblein, parhti hain kalma Noor ka
Baaraween ke chaand ka mujra hai sajda Noor ka
Baara burjon se jhuka ek ek sitaara Noor ka
Un ke qasr-e-qadr se Khuld ek kamra Noor ka
Sidra paayein baagh mein nanha sa poda Noor ka
Arsh bhi, Firdous bhi, is Shah-e-wala Noor ka
Yeh musamman burj woh mushkoye a’ala Noor ka
Aayi bid’at, chhaayi zulmat, rang badla Noor ka
Maah-e-Sunnat, mehr-e-tal’at le le badla Noor ka
Tere hi maathe raha aye jaan sehra Noor ka
Bakht jaaga Noor ka, chamka sitaara Noor ka
Main gada tu baadshah, bhar de pyaala Noor ka
Noor din doona tera de daal sadqa Noor ka
Teri hi jaanib hai paanchon waqt sajda Noor ka
Rukh hai Qibla Noor ka, abroo hai Kaaba Noor ka
Pusht par dhalka sar-e-anwar se shamla Noor ka
Dekhein Musa Toor se utra saheefa Noor ka
Taaj wale dekh kar tera imaama Noor ka
Sar jhukate hain ilahi bol baala Noor ka
Beeniy-e-purnoor par rakhshan hai bukka Noor ka
Hai Liwa-ul-Hamd par urta pharera Noor ka
Mushaf-e-’aariz pe hai khat-e-shafi’ah Noor ka
Lo siyah kaaro mubarak ho qabala Noor ka
Aab-e-zar banta hai aariz par paseena Noor ka
Mushaf-e-ijaaz par chadhta hai sona Noor ka
Paich karta hai fida hone ko lam’a Noor ka
Gard-e-sar phirne ko banta hai imaama Noor ka
Haibat-e-’aariz se tharata hai shola Noor ka
Kafsh-e-paa par gir ke ban jaata hai guppa Noor ka
Sham’a dil, mishkat tan, seena zujajah Noor ka
Teri soorat ke liye aaya hai Surah Noor ka
Mail se kis darja suthra hai woh putla Noor ka
Hai galey mein aaj tak kora hi kurta Noor ka
Tere aage khaak par jhukta hai maatha Noor ka
Noor ne paaya tere sajde se seema Noor ka
Tu hai saaya Noor ka, har uzw tukda Noor ka
Saaya ka saaya na hota hai, na saaya Noor ka
Kya bana naam-e-Khuda Asra ka dulha Noor ka
Sar pe sehra Noor ka, bar mein shahana Noor ka
Bazm-e-wahdat mein maza hoga dobaala Noor ka
Milne sham’a-e-Toor se jaata hai ikka Noor ka
Wasf-e-rukh mein gaati hain hoorain taraana Noor ka
Qudrati beenon mein kya bajta hai lehra Noor ka
Yeh kitaab-e-Kun mein aaya turfa aayah Noor ka
Ghair-e-qail kuch na samjha koi ma’na Noor ka
Dekhne walon ne kuch dekha na bhaala Noor ka
Man ra’a kaisa yeh aaeena dikhaya Noor ka
Subah kar di kufr ki, sach tha mujda Noor ka
Shaam hi se tha shab-e-teera ko dhadka Noor ka
Padti hai noori bharn, umda hai darya Noor ka
Sar jhuka aye kisht-e-kufr, aata hai ahla Noor ka
Naariyon ka daur tha, dil jal raha tha Noor ka
Tum ko dekha ho gaya thanda kaleja Noor ka
Naskh adyaan kar ke khud qabza bithaaya Noor ka
Taajwar ne kar liya kaccha ilaaka Noor ka
Jo gada dekho liye jaata hai toda Noor ka
Noor ki sarkar hai, kya us mein toda Noor ka
Bheek le Sarkar se, laa jald kaasa Noor ka
Maah-e-no Tayba mein batt'ta hai mahina Noor ka
Dekh un ke hote nazeeba hai da'wa Noor ka
Mehr likh de yaan ke zarron ko muchalka Noor ka
Yaan bhi daagh-e-sajda-e-Tayba hai tamgha Noor ka
Aye Qamar, kya tere hi maathe hai tika Noor ka
Sham’a saan ek ek parwana hai us baa Noor ka
Noor-e-Haq se lo lagaaye, dil mein rishta Noor ka
Anjuman waale hain anjum, bazm halka Noor ka
Chaand par taaron ke jhurmat se hai haala Noor ka
Teri nasl-e-paak mein hai bachcha bachcha Noor ka
Tu hai ain-e-Noor, tera sab gharana Noor ka
Noor ki sarkar se paaya doshala Noor ka
Ho mubarak tum ko Zulnoorain joda Noor ka
Kis ke parde ne kiya aaeena andha Noor ka
Maangta phirta hai aankhein har nageena Noor ka
Ab kahan woh tabishain, kaisa woh tadka Noor ka
Mehr ne chhup kar kiya khaasa dhundhalka Noor ka
Tum muqaabil the to pehron chaand badhta Noor ka
Tum se chhut kar munh nikal aaya zara sa Noor ka
Qabr-e-anwar kahiye ya qasr-e-mu’alla Noor ka
Charkh-e-atlas ya koi saada sa qubbah Noor ka
Aankh mil sakti nahi, dar par hai pehra Noor ka
Taab hai be-hukm par maare parinda Noor ka
Naz’a mein lautega khaak-e-dar pe shaida Noor ka
Mar ke odhegi aroos-e-jaan dupatta Noor ka
Taab-e-mehr-e-Hashr se chonke na kushta Noor ka
Boondiyan rehmat ki dene aayin chheenta Noor ka
Waz’a-e-waazeh mein teri soorat hai ma’na Noor ka
Yoon majaazan chahein jisko keh dein kalma Noor ka
Anbiya ajza hain to bilkul hai jumla Noor ka
Is ilaqay se hai un par naam sucha Noor ka
Yeh jo mehr o mah pe hai itlaq aata Noor ka
Bheek tere naam ki hai isti’ara Noor ka
Surmageen aankhein Hareem-e-Haq ke woh mushkeen ghazaal
Hai faza-e-la-makaan tak jinka ramna Noor ka
Taab-e-husn-e-garm se khil jaayenge dil ke kanwal
Nau bahaaren laaye ga garmi ka jhalka Noor ka
Zarre mehr-e-Quds tak tere tawassut se gaye
Hadd-e-ausat ne kiya sughra ko kubra Noor ka
Sabza-e-gardoon jhuka tha bahr-e-pa bosa-e-Buraaq
Phir na seedha ho saka, khaya woh koda Noor ka
Taab-e-sam se chondhiya kar, chaand unhein qadamoun phira
Hans ke bijli ne kaha dekha chhalawa Noor ka
Deed-e-naqsh-e-sum ko nikli saat pardoun se nigaah
Putliyan bolein chalo aaya tamaasha Noor ka
Aks-e-sum ne chaand sooraj ko lagaaye chaar chaand
Pad gaya seem o zar-e-gardoon pe sikka Noor ka
Chaand jhuk jaata jidhar ungli uthatay mahd mein
Kya hi chalta tha ishaaron par khilona Noor ka
Ek seena tak mushaabeh, ek wahan se paaon tak
Husn-e-Sibtain un ke jamon mein hai neema Noor ka
Saaf shakl-e-paak hai dono ke milne se aayaan
Khat-e-tawam mein likha hai yeh do warqa Noor ka
Kaaf gaisoo, ha daahan, yaa abroo aankhein ain saad
Kaaf haa yaa ain saad un ka hai chehra Noor ka
Aye Raza yeh Ahmed-e-Noori ka faiz-e-Noor hai
Ho gayi meri ghazal barh kar qaseeda Noor ka