Sar-e-Maidaan-e-Mahshar Jab Meri Fard-e-Amal Nikli

Sar-e-Maidaan-e-Mahshar jab meri fard-e-amal nikli

To sab se pehle is mein naat-e-Hazrat ki ghazal nikli

Tabiyat un ke diwaanon ki ab kuch kuch sanbhal nikli

Hawa-e-dasht-e-Taiba gulshan-e-jannat mein chal nikli

Bara daawa tha khursheed-e-qayamat ko hararat ka

Tere abr-e-karam ko dekh kar rangat badal nikli

Lipat kar reh gaye mujrim tere daaman-e-rehmat mein

Qayamat mein qayamat ki hawa jab tez chal nikli

Munawwar kar diya daagh-e-jigar ne zarre zarre ko

Mere jaate hi meri qabar mein ek shama jal nikli

Munawwar kaam aayi hashr mein naat-e-sheh-e-wala

Bohat dil kash, bohat roshan, meri fard-e-amal nikli