Rawaan Hai Kaarwaan-e-Rang O Bu Sarkar Ke Dam Se

Rawaan hai kaarwaan-e-rang o bu Sarkar ke dam se

Do aalam ki ragon mein hai lahoo Sarkar ke dam se

Karein hum kyu na hum apni aabroo Sarkar par qurbaan

Ke qaim hai hamaari aabroo Sarkar ke dam se

Wo mehboob-e-Khuda hain, wajah e takhleeq-e-do aalam hain

Hue aabaad saare kaah o ku Sarkar ke dam se

Inhi ke noor se yeh mehfil-e-hasti hui roshan

Chiraghaan hai jahaan mein chaar so Sarkar ke dam se

Lagan bakhshi humein Sarkar ne ibtaal-e-batil ki

Shi'aar apna hai haq ki justuju Sarkar ke dam se

Rasool-e-Paak ki naatein na kyu Mahmood hum gaayein

Mila hai tum ko zauq-e-guftugu Sarkar ke dam se