Rakh Lein Wo Jo Dar Par Mujhe Darban Waghera

Rakh lein wo jo dar par mujhe darban waghera

Phir kya hain mere samne sultan waghera

Khairat mili ho jinhein sarkar ke dar se

Duniya ke uthate nahi ehsan waghera

Aaqa ki chatai ki to wo shan hai wallah

Bas naam ke hain takht-e-Suleman waghera

Taseer luab dehen-e-pak hai aisi

Sar qadmon mein rakh dete hain Luqman waghera

Banna hai mujhe khak-e-reh-e-shehr-e-Madina

Ban kar mujhe rehna nahi mehmaan waghera

Mil jaye jise dasht-e-Arab sair ki khatir

Kyun maangein wo jannat ke gulistan waghera

Aain to sahi aap ke mangte ke muqabil

Jitne bhi zamane ke hain sultan waghera