Raah-e-‘irfaan Se Jo Hum Na-deedah Ro Mehram Nahin

Raah-e-‘irfaan se jo hum na-deedah ro mehram nahin

Mustafa hai masnad-e-irshaad par kuch gham nahin

Hoon Musalmaan garchay naaqis hi sahi ae kaamilo!

Maahiyat paani ki aakhir yam se nam mein kam nahin

Ghunche maa awhaa ke jo chutkay danaa ke baagh mein

Bulbul-e-sidrah tak un ki boo se bhi muharram nahin

Us mein Zam Zam hai ke tham tham, us mein Jam Jam hai ke baish

Kasrat-e-Kausar mein Zam Zam ki tarah kam kam nahin

Panjah-e-mehr-e-Arab hai jis se daryaa beh gaye

Chashma-e-khurshid mein to naam ko bhi nam nahin

Aisa ummi kis liye munt-kash-e-ustaad ho

Kya kafaayat us ko Iqra’ Rabbukal Akram nahin

Aus mehr-e-hashr par par jaaye pyaaso to sahi

Us gul-e-khandaan ka rona, giryah-e-shabnam nahin

Hai unhi ke dam qadam ki baagh-e-‘aalam mein bahaar

Woh na thay ‘aalam na tha, gar woh na hon ‘aalam nahin

Saayah-e-deewaar o khaak-e-dar ho Ya Rabb aur Raza

Khwahish-e-dayhim-e-Qaiser, shauq-e-takht-e-Jam nahin