Noori Mehfil Pe Chadar Tani Noor Ki
Noori Mehfil Pe Chadar Tani Noor Ki
Noori mehfil pe chadar tani noor ki
Noor phela hua aaj ki raat hai
Chaandni mein hain doobe hue do jahan
Kaun jalwa numa aaj ki raat hai
Farsh par dhoom hai arsh par dhoom hai
Hai wo bad bakht jo aaj mehroom hai
Phir ye aaye gi shab kis ko maloom hai
Aam lutf-e-Khuda aaj ki raat hai
Momino aaj ganj-e-sakha loot lo
Loot lo ae marizo! shafa loot lo
Aasiyo rehmat-e-Mustafa ﷺ loot lo
Baab-e-rehmat khula aaj ki raat hai
Abr-e-rehmat hain mehfil pe chhaye hue
Aasman se malaa'ik hain aaye hue
Khud Muhammad ﷺ hain tashreef laye hue
Kaisi ronaq faza aaj ki raat hai
Maang lo maang lo chashm-e-tar maang lo
Dard-e-dil aur husn nazar maang lo
Sabz gumbad ke saaye mein ghar maang lo
Maangne ka maza aaj ki raat hai
Is taraf noor hai us taraf noor hai
Sara alam musarrat se maamoor hai
Jis ko dekho wahi aaj masroor hai
Mehak uthi fiza aaj ki raat hai
Waqt laaye Khuda sab Madine chalein
Lootne rehmaton ke khazine chalein
Sab ke manzil ki janib safeene chalein
Meri Saaimؔ dua aaj ki raat hai