Nigah-e-Aashiq Ki Dekh Leti Hai Parda Meem Ko Utha Kar

Nigah-e-aashiq ki dekh leti hai parda Meem ko utha kar

Woh bazm-e-yasrab mein aage baithein hazar munh ko chhupa chhupa kar

Jo tere kooche ke sakinon ka faza-e-jannat mein dil na behla

Tasalliyan de rahi hain hoorain khushamadon se mana mana kar

Shaheed-e-ishq Nabi ke marne mein bankapan bhi hain so tarah ke

Ajal bhi kehti hai zinda bashi humare marne pe zeher kha kar

Tere sana go aroos-e-rahmat se chhed karte hain roz-e-mahshar

Ke isko peeche laga liya hai gunah apne apne dikha dikha kar

Bata'aye dete hain ae saba hum ye gulistan-e-arab ki boo hai

Magar na ab hath la idhar ko waheen se laayi hai tu udaa kar

Shaheed-e-ishq-e-Nabi hoon meri lahd pe shama qamar jalegi

Utha ke layenge khud farishte charagh khursheed se jala kar

Jise mohabbat ka dard kehte hain maaya-e-zindagi hai mujh ko

Ye dard woh hai ke maine rakha hai isko dil mein chhupa chhupa kar

Uda ke laaye hai ae saba tu jo boo-e-zulf-e-munabareen ko

Humein achi nahin ye baatein Khuda ki raah mein bhi kuch dia kar

Khayaal-e-raah-e-adam se Iqbal tere dar par hua hai hazir

Baghal mein zaad-e-amal nahin hai silah meri naat ka ata kar