Nazar Jamal-e-Rukh Nabi Par Jami Hui Hai Jami Rahe Gi

Nazar jamal-e-rukh Nabi par jami hui hai jami rahe gi

Humare dil mein Nabi ki ulfat basi hui hai basi rahe gi

Humein yaqeen hai ke kaam apne banein ge aakhir karam se unke

Rasul Akram se lo humari lo lagi hui hai lagi rahe gi

Wohi hai malja wohi hai mawa yeh baat kehte hain hum bedawa

Yeh aik haqeeqat hai loh-e-dil par likhi hui hai likhi rahe gi

Khuda ne bakhshi unhein woh azmat khuda ne bakhshi unhein woh rifat

Ke har bulandi huzoor unke jhuki hui hai jhuki rahe gi

Suno yeh mujda gunahgaro dar-e-Rasul Khuda pe aao

Maaf karne pe unki rehmat tulu hui hai tulu rahe gi

Woh sadiyon pehle jahan mein aaye unhein zamana kabhi na bhula

Azal se dhoom unki do jahan mein machi hui hai machi rahe gi

Humein hai maloom khob zahid yeh kufr kya hai woh shirk kya hai

Jabeen humari Nabi ke dar par jhuki hui hai jhuki rahe gi

Hum is paimbar ke ummati hain jo mazhar-e-qudrat-e-khuda hai

Humari har aik baat bigri bani hui hai bani rahe gi

Zahe muqaddar Riaz mujhe mila hai faiz naseem-e-Taiba

Yeh mere dil ki kali to dekho khili hui hai khili rahe gi