Nabiؐ Ki Shan Ke Mazhar Ali Ibn-e-abi Talib

Nabiؐ ki shan ke mazhar Ali ibn-e-Abi Talib

Shujaat ke haseen paikar Ali ibn-e-Abi Talib

Shah-e-Batha ne man kuntu kaha hai jin ke bare mein

Shah-e-Batha ke wo dilbar Ali ibn-e-Abi Talib

Hai jin ki shan mein Lahamuka Lahmi Jismuka Jismi

Wo jism o jaan e paighambar Ali ibn-e-Abi Talib

Sarapa ilm aur irfan, mujassam lutf aur ehsaan

Karam shiwa, karam gastar Ali ibn-e-Abi Talib

Sapehr-e-hikmat o roohaniat ke Nayyar-e-taban

Amir-o-fateh-e-Khaibar Ali ibn-e-Abi Talib

Mere hamdam, mere mahram, mere haami, mere wali

Mere Maula, mere rehbar Ali ibn-e-Abi Talib

Maza peene ka to bas hashr mein aaye ga ae Taibؔ

Ke honge saqi-e-Kausar Ali ibn-e-Abi Talib.