Muqaddar Ko Mere Bakhshi Gayi Rehmat Ki Tabani

Muqaddar ko mere bakhshi gayi rehmat ki tabani

Mere hisse mein aayi hai Muhammad ki sana khwani

Mohabbat Sarwar-e-Konainؐ ki jis dil ko hasil ho

Use hogi na roz-e-Hashr koi bhi pareshani

Zamana ta abad jhukta rahega un ke qadmon mein

Jinhe hasil hui hai Waliٔ-e-Batha ki darbani

Arab ki azmatain Allah o Akbar aapؐ ke dam se

Hui sahra nasheenon ke muqaddar mein jahanbani

Nabiؐ ko Noor kehna to ik adna si aqeedat hai

Jahan zikr-e-Muhammadؐ ho woh sari bazm-e-Noorani

Kabhi to keh ke Mastana Zahooriؔ ko bulayenge

Kabhi to kaam aajayegi meri chak daamani