Muhammad Mustafa Ne Kis Qadr Eijaaz Farmaya

Muhammad Mustafa ne kis qadr eijaaz farmaya

Shutur bano ko shahon ki tarah mumtaaz farmaya

Arab ke reg zaron mein jo oonton ko charh'tay thay

Inhe duniya ki sultani se sarafraz farmaya

Koi un ki murrawat ka karay inkar to kyon kar

Jinhon ne har adawat ko nazar andaz farmaya

Jab apne dushmanon ko bakhsh dena ghair mumkin tha

Huzoor pak ne is rasm ka aghaz farmaya

Wo insaan qatl-o-gharat mein darindon se jo barh kar tha

Usi ko aap ne insaan ka damsaz farmaya

Jo ahl-e-falsafa ki aql ki sar'had se bahar tha

Arab ke aik ummi ne aiyan wo raaz farmaya

Unhi ke wastay ye mehfil-e-hasti muzayyan hai

Khuda ne aik bashar ka kis qadr aizaaz farmaya

Kisi insaan ki azmat is se barh kar kya ho aye Bazmi!

Khuda ne aap ke akhlaaq par khud naaz farmaya