Mira Jahan Bhi Tu, To Hi Aaqibat Meri

Mira jahan bhi tu, to hi aaqibat meri

Tire baghair nahi kuch bhi haisiat meri

Mira jhuka hua sar bhi buland hai kitna

Tira nishan e kaf pa hai saltanat meri

Bas aik boond tire, mere ilm ka darya

Bas aik ism e grammi tira lughat meri

Tire khayal mein rehta hai gum wujud mira

Maqam ki nahi mohtaaj shehriat meri

Jo waqt sarf hua apne liye wahi ghaata

Jo saans kharch ho tujh par wahi bachat meri

Jo tujh ko dekh kar aaye mein wo nazar dekhoon

Jidhar se tiri sada aaye wo jahat meri

Mein kya karoon tirii nisbat pe naaz hai mujh ko

Mire niaz ka hissa hai tamkanat meri

Muzaffar un ke gulamon ka bhi ghulam hoon mein

Jahan mein kyu na barhe qadar o manzilat meri