Mere Dil Mein Hai Yaad-e-Muhammad ﷺ Mere Honton Pe Zikr-e-Madina

Mere dil mein hai yaad-e-Muhammad ﷺ mere honTon pe zikr-e-Madina

Tajdar-e-Haram ke karam se aa gaya zindagi ka qareena

Main ghulam-e-ghulaman-e-Ahmed main sag-e-aastan-e-Muhammad

Qabil-e-fakhr hai maut meri qabil-e-rashk hai mera jeena

Dil shikasta hai mera to kya gham is mein rehte hain Shah-e-Do Aalam

Jab se mehmaan hue hain wo dil mein, dil mera ban gaya hai Madina

Har khata par meri chashm poshi har talab par 'ataon ki barish

Mujh gunah garr par kis qadr hain meherban Tajdar-e-Madina

Mujh ko tofan ki maujon ka kya darr yeh guzar jaen gi rukh badal kar

Nakhuda hain mere jab Muhammad kaise doobega mera safeena

Dolat-e-Ishq se dil ghani hai meri qismat hai rashk-e-Sikandar

Madhat-e-Mustafa ki badolat mil gaya hai mujhe yeh khazeena