Main Kabhi Nasr Kabhi Nazm Ki Soorat Likhoon

Main kabhi nasr kabhi nazm ki soorat likhoon

Teri soorat teri seerat teri madahat likhoon

Teri naimatain kabhi ilham ki soorat utrain

Aankh main khwab liye raaz-e-haqiqat likhoon

Masjiday madarsay barood ki zad main aayen

Kis tarah she'r main ummat ki museebat likhoon

Yaad-e-Tayba main barasti rahain aankhain meri

Kaise ashkon se main naghmaat-e-aqeedat likhoon

Us ke alfaz main khiltay hain aqeedat ke gulaab

Teri tareef main jo bhi main ibarat likhoon

Poore Qur'an main tauseef likhi hai teri

Us ko parh parh ke teri shan-e-risalat likhoon

Bazm main hoon to zubaan pe ho tera zikr-e-jameel

Ho jo tanhai mayassar teri ulfat likhoon

Maan ne bachpan main mujhe ye bhi naseehat ki thi

Jab talak zinda rahoon aap ki madahat likhoon