Ma Ke Haider, Baap Ke Zaid, Aur Muhammadؐ Ke Ali

Ma ke Haider, baap ke Zaid, aur Muhammadؐ ke Ali

Teri hasti khamiyah qudrat ka shahkar-e-jali

Main bataun Khanah Ka'bah mein kyun paida hua

Batn-e-madar mein hi tu tauheed ka shaida hua

Tera har lamha raha Shah-e-Rusal ke saaye mein!

Jis tarah khushbu charhey parwan gul ke saaye mein

Saath rakhte the meray aaqa mahazon par tujhe

Kyun na manoun quwat-e-bazu e Paighambar tujhe

Naaz har maidan ko tha teri adaaye harb par

Seenkrhon sajde fida talwar ki ik zarb par

Ma'rifat ka ghar tera dil, maskan-e-hikmat dimaagh

Haath mein Islam ke, teri baseerat ke chiraagh

Ek manzil ke musafir, sufioun ke silsile

Sab juda raston pe nikle sab hi tujh se ja mile

Teri chaukhat par zamane bhar ke an daata girain

Tu hai woh gehra samandar jis mein sab darya girain

Tere qaatil ki adawat apne haathoun mar gayi

Hashr tak zinda tujhe teri shahadat kar gayi