Lab Par Naat-e-Paak Ka Naghmaa Kal Bhi Tha Aur Aaj Bhi Hai

Lab par naat-e-paak ka naghmaa kal bhi tha aur aaj bhi hai

Mere Nabi se mera rishta kal bhi tha aur aaj bhi hai

Past woh kaise ho sakta hai jis ko Haq ne buland kiya

Dono jahan mein un ka charcha kal bhi tha aur aaj bhi hai

Aur kisi jaanib kyun jaayein aur kisi ko kyun dekhein

Apna sab kuch gunbad-e-khazra kal bhi tha aur aaj bhi hai

Fikr nahi hai hum ko kuch bhi dukh ki dhoop kari to kya

Hum par un ke fazl ka saaya kal bhi tha aur aaj bhi hai

Un ke karam ki khushboo se hai kaisa meri qismat ka gulaab

Shaakh-e-chaman par mehka mehka kal bhi tha aur aaj bhi hai

Tay karte hain naam se un ke dasht-e-hayat ki har manzil

Raah-e-zeest mein un ka sahaara kal bhi tha aur aaj bhi hai

Bata do gustaakh-e-Nabi ko gairat-e-Muslim zinda hai

Un par mar mitne ka jazba kal bhi tha aur aaj bhi hai

Jis ke faiz se banjar seenon ne shaadabi paayi hai

Mauj mein woh rehmat ka darya kal bhi tha aur aaj bhi hai

Zaad-e-safar ki fikr mein gum tha ishq ne mujh ko batla ya

Dil se Madine ka ik rasta kal bhi tha aur aaj bhi hai

Jin aankhon se Tayyiba dekha woh aankhein be-taab hain phir

Un aankhon mein ek taqaaza kal bhi tha aur aaj bhi hai

Un ke dar se sab ho aaye ja na saka to ek Sabih

Yeh ke ek tasweer-e-tamanna kal bhi tha aur aaj bhi hai