Kitna Bara Hai Mujh Pe Yeh Ehsaane Mustafaؐ

Kitna bara hai mujh pe yeh ehsaane Mustafaؐ

Kehte hain log mujh ko sana khaan-e-Mustafaؐ

Jibrael se mujhe bhi hai nisbat qareeb ki

Woh bhi hai aur main bhi hoon darbaan-e-Mustafaؐ

Bakhshish nisaar hone ko aayi hazaar baar

Dekha jo mujh pe saaya-e-damaan-e-Mustafaؐ

Dozakh mein jaye ga na koi ummati mera

Allah se hua hai yeh paimaan-e-Mustafaؐ

Ik ek kar ke band huay saare maikade

Us shaan se khula hai khumastaan-e-Mustafaؐ

Yaarab mujhe bhi deeda-e-Hassaan kar ata

Haasil ho is gada ko bhi irfaan-e-Mustafaؐ

Azam kabhi mujhe bhi to bulwayen ge Huzoorؐ

Ek din banoon ga main bhi to mehmaan-e-Mustafaؐ