Khuda Ka Woh Aakhri Paighambar
Khuda Ka Woh Aakhri Paighambar
Khuda ka woh aakhri paighambar
Khara hai Faraan ki chotiyon par
Jo deen-e-Islam le ke aaya
Khuda ka paighaam le ke aaya
Nigah sab ki hai jis ki jaanib
Jo ahl-e-Makkah se hai mukhatib
Tumhaari nazron ke saamne hai
Tamaam logon ke saamne hai
Mera har ik lamha zindagi ka
Kabhi dukhaya hai dil kisi ka?
Kaho kabhi maine jhoot bola?
Kabhi khiyanat ka zehr ghola?
To sab pukarein: "Nahi Muhammad ﷺ"
"Ke tum ho Sadiq, Ameen Muhammad ﷺ"
Kaha yeh phir shaah-e-doosra ne
"Nabi banaya mujhe Khuda ne"
Ussi ki deta hoon main shahadat
Yeh jaan lo laaiq-e-ibaadat
Koi Khuda ke siwa nahi hai
Yeh butt, yeh pathar Khuda nahi hai
Suna jo elaan-e-Mustafai
Sama’at-e-kufr talmalai
Abhi jo taa’eed kar rahe the
Huzoor ka dum jo bhar rahe the
Bharak uthe Haq ki baat sunkar
Pahaad se sab ne sang chun kar
Muhammad Mustafa ko maare
Sitam ne pathar, wafa ko maare
Lahoo mein apne nahaate Aaqa
Rahi dua go sadaaye Aaqa
Wohi sada door door pohanchi
Biraah-e-taht-ush-shu’oor pohanchi
Ussi sada se woh noor phoota
Naseeb-e-jahl o ghuroor phoota
Ussi sada se zameer chamke
Jale usi se diye Haram ke
Wohi sada ilm ka Madina
Raah-e-amal irtiqa ka zeena
Tamaam Qur’an wohi sada hai
Urooj-e-insaan wohi sada hai
Zamana reh jaaye tum se peeche
Chale chalo uss sada ke peeche