Kaabay Ki Ronak Kaabay Ka Manzar, Allahu Akbar Allahu Akbar

Kaabay ki ronak kaabay ka manzar, Allahu Akbar Allahu Akbar

Dekhun to dekhe jaaun barabar, Allahu Akbar Allahu Akbar

Hamd Khuda se tar hain zubanein, kaanon mein ras gholti hain azaanein

Bas ek sada aa rahi hai barabar, Allahu Akbar Allahu Akbar

Tere karam ki kya baat Maula, Tere haram ki kya baat Maula

Ta umr likh de aana muqaddar, Allahu Akbar Allahu Akbar

Maangi hain jitni maine duain, maqbool hongi, manzoor hongi

Mezaab-e-rahmat hai mere sar par, Allahu Akbar Allahu Akbar

Hairat se khud ko kabhi dekhta hoon, aur dekhta hoon kabhi main haram ko

Ke laaya kahaan mujh ko mera muqaddar, Allahu Akbar Allahu Akbar

Yaad aa gayi jab apni khataayein, ashkon mein dhhalne lagein iltijaayein

Roya ghilaf-e-Kaaba pakad kar, Allahu Akbar Allahu Akbar

Bheja hai jannat se tujh ko Khuda ne, chuma hai tujh ko mere Mustafa ne

Ae Sang-e-Aswad tera muqaddar, Allahu Akbar Allahu Akbar

Dekha Safa aur Marwa bhi dekha, Rab ke karam ka jalwa bhi dekha

Dekha wahan ek saroon ka samundar, Allahu Akbar Allahu Akbar

Maula Sabih aur kya chahta hai, bas maghfirat ki dua chahta hai

Bakhshish ke taalib pe apna karam kar, Allahu Akbar Allahu Akbar