Jo Lab Pe Khair Ul-waraؐ Ke Aaya Wo Lafz Farmaan Ho Gaya Hai

Jo lab pe khair ul-waraؐ ke aaya wo lafz farmaan ho gaya hai

Bahaar-e-madhat ka hai wo mujda, sana ka unwaan ho gaya hai

Chamak uthi phir haseen mehfil, darood-e-khair al-basharؐ ki zo se

Chala hai zikr-e-Huzoorؐ jab bhi wo noor-e-irfan ho gaya hai

Diyar-e-Tayyaba mein shab guzaare, jahan mohabbat ke hain nazare

Jo mudaton se taras raha tha, wo Unؐ ka mehmaan ho gaya hai

Rasool-e-akramؐ ki pairvi mein guzaari jis ne hayat apni

Ghareeb o nadar wo gada bhi, jahan ka sultan ho gaya hai

Wohi hai ishq-e-nabiؐ mein kaamil hai, wohi hai hub-e-nabiؐ ka waaris

Rah-e-mohabbat mein chalte chalte fana jo insaan ho gaya hai

Milein ziyaaen mujhe hunar ki, waqar-e-saut o sada bhi nikhra

Rasool-e-rahmatؐ ka zikr-e-anwar, usi ki pehchaan ho gaya hai

Nahin hai Goharؔ tumhein saleeqa keh phool alfaaz ke sajao

Jo keh rahe ho sana-e-khwajaؐ, Khuda ka ahsaan ho gaya hai