Jo Firdous Tasawwur Hain Wo Manzar Yaad Aate Hain

Jo firdous tasawwur hain wo manzar yaad aate hain

Madine ke gali kooche barabar yaad aate hain

Jo lagta hai koi kankar badan par deen ki khatir

To dil ko waadi Taif ke patthar yaad aate hain

Fizaon mein agar koi parinda raqs karta hai

To aankhon ko Madine ke kabootar yaad aate hain

Maratib paaye hain kya kya teri nisbat se zarro ne

Abu Bakr o Umar, Usman o Haider yaad aate hain

Akhuwat aur eesaar o mohabbat jin ka shewa tha

Wo aali zarf Ashab e Paigambar yaad aate hain

Zamane ki garan khwabi ka alam dekh kar Azhar

Nabi ﷺ ke deen ki bedari ke paikar yaad aate hain