Jis Ka Qaseeda Khaaliq-e-Arsh-e-Bareen Kahe

Jis ka qaseeda Khaaliq-e-Arsh-e-Bareen kahe

Aisa haseen husn bhi jisko haseen kahe

Hai ma-wara-e-aql o khird un ka martaba

Zaat unki be-misaal hai Rooh-ul-ameen kahe

Qur’aan ke harf harf mein unhi ki na’at hai

Yazdaan use kalaam mein mehr-e-mubeen kahe

Parhtay hain aasman par farishte bhi jab durood

Un par salaam kaise na phir yeh zameen kahe

Farmaan, Haq ka hai tujhe sajda rawa nahi

Har chand baar baar khameeda jabeen kahe

Naqvi ko aisa shewa-e-guftaar ho ata

Jis waqt bhi woh na’at kahe dilnasheen kahe