Jab Sajti Hai Bande Ki Dua Sall-e-ala Se

Jab sajti hai bande ki dua Sall-e-Ala se

Barh jati hai Maula ki ata Sall-e-Ala se

Be-kaif sadaon se hai manoos zamana

Ho jaye ye maamoor fizaa Sall-e-Ala se

Jab dhoop kadi ho tere sar par to parh kar

Chha jati hai ghanghor ghata Sall-e-Ala se

Jeevan mera masmoom fizaon mein ghira hai

Milti hai mujhe thandi hawa Sall-e-Ala se

Zakhmon ka gulistan khila dil mein hai to kya gham

Har zakhm ko milti hai dawa Sall-e-Ala se

Murshid ne bataya hai ye pernoor wazifa

Aajati hai chehre pe ziya Sall-e-Ala se

Duniya ke andheron mujhe ghiren bhi to kaise

Afkar ka roshan hai diya Sall-e-Ala se

Duniya ke khazanon se sarokar nahi hai

Dhadkan ko ye karte hain juda Sall-e-Ala se

Hassaan ki bakhshish ka ye samaan hain naatein

Ho duniya o uqba mein bhala Sall-e-Ala se