Ilhaam Ki Rim Jhim Kahin Bakhshish Ki Ghata Hai
Ilhaam Ki Rim Jhim Kahin Bakhshish Ki Ghata Hai
Ilhaam ki rim jhim kahin bakhshish ki ghata hai
Yeh dil ka nagar hai ke Madine ki fiza hai
Saanson mein mehakti hain manajat ki kaliyan
Kaliyon ke katoron pe tera naam likha hai
Aayaat ki jhurmat mein tere naam ki masnad
Lafzon ki anguthi mein nageena sa jura hai
Ab koi had-e-husn talabb soch sake ga
Konaain ki wusat to teh dast-e-dua hai
Hai teri kissak mein bhi damak hashr ke din ki
Wo yun ke mera qariya-e-jaan goonj utha hai
Khursheed teri raah mein bhatakta hua jugnoo
Mehtab tera reeza naqsh-e-kaf-e-pa hai
Wal-lail tere saaya geesu ka tarasha
Wal-asr teri neem nigahi ki ada hai
Lamhon mein simat kar bhi tera dard hai tazah
Sadiyon mein bikhar kar bhi tera ishq naya hai
Ya tere khudokhaal se kherah mah-o-anjum
Ya dhoop ne saaya tera khud oorh liya hai
Ya raat ne pehni hai malahatt teri tan par
Ya din tere andaaz-e-sabahatt pe gaya hai
Rag rag ne samaitti hai tere naam ki fariyaad
Jab jab bhi pareshan mujhe duniya ne kiya hai
Khaliq ne qasam khai hai us sheher amaan ki
Jis sheher ki galiyun ne tujhe werd kiya hai
Ik baar tera naqsh-e-qadam choom liya tha
Ab tak yeh falak shukr ke sajde mein jhuka hai
Dil mein ho teri yaad to toofaan bhi kinara
Haasil ho tera lutf to sarsar bhi saba hai
Ghairon pe bhi alfaaz tere sab se alag the
Apnon pe nawazish ka bhi andaaz juda hai
Har simt tere lutf-o-inayat ki baarish
Har soo tera daaman-e-karam phail gaya hai
Hai mouj-e-saba ya tere saanson ki bhikaran
Hai mausam-e-gul ya teri khairaat-e-qaba hai
Sooraj ko ubharne nahi deta tera habshi
Be zar ko Abuzar teri bakhshish ne kiya hai
Saqlain ki qismat teri dehleez ka sadqa
Aalam ka muqaddar tere haathon pe likha hai
Utre ga kahan takk koi aayat ki tah mein
Quran tere khatir abhi masroof-e-sana hai
Ab aur bayan kya ho kisi se teri madahatt
Yeh kam to nahi hai ke tu Mehboob-e-Khuda hai
Ae Gunbad-e-Khazra ke makeen meri madad kar
Ya phir yeh bata kon mera tere siwa hai
Bakhshish teri aankhon ki taraf dekh rahi hai
Mohsin tere darbaar mein chup chaap khada hai