Hum Soye Hashr Chalein Ge Sheh Abrrar Ke Saath
Hum Soye Hashr Chalein Ge Sheh Abrrar Ke Saath
Hum soye hashr chalein ge Sheh Abrrar ke saath
Qaafila hoga rawaan qaafila salar ke saath
Madah Khwaja Deen madah Sarkar ke saath
Zindagi guzri hai kefiyat sarshar ke saath
Main bhi wabasta hoon Sarkar ke darbar ke saath
Khaak ka zarra bhi hai Alam-e-Anwaar ke saath
Reh gaye manzil-e-Sidrah pe pohanch kar Jibrail
Chal nahi sakta Farishta teri raftaar ke saath
Bakht bedaar hai yawar hai muqaddar us ka
Jis ne dekha hai unhein deedah-e-bedaar ke saath
Ye to Taybah ki mohabbat ka asar hai warna
Kaun rota hai lipat kar daro-deewar ke saath
Mil hi jaaye ga koi khwaan-e-karam ka tukda
Hai taluq jo sagan-e-dar-e-Sarkar ke saath
Ae Khuda di hai agar naat-e-Nabi ki tofeeq
Husn-e-kirdar bhi de lazzat-e-guftaar ke saath
Jab khule hashr mein gesu-e-shafaat un ke
Hum se aasi bhi nazar aayenge abrrar ke saath
Main ye kehta hoon ke tha un ki nazar ka aijaz
Log kehte hain ke deen phaila hai talwar ke saath
Aisa hajj zahmat-e-beja ke siwa kuch bhi nahi
Ishq mehkum na ho gar Ahmad-e-Mukhtar ke saath
Shehr-e-Yasrab ka musafir nahi reh main tanha
Karwan-e-shauq ka hai taalib-e-deedaar ke saath
Gar Madine ka tasawwur ho to zulmat kaisi?
Rabt mazboot rahe Alam-e-Anwaar ke saath
Ye na hota to na bach sakte tajalli se Kaleem
Noor-e-Hazrat ka bhi tha Tor ke anwaar ke saath
Un ke jaluon ne kya kon-o-makan ko roshan
Husn-e-Yusuf ka raha Misr ke Bazaar ke saath
Pul se mujh sa bhi gunehgaar guzar jaaye ga
Ho gi Sarkar ki rehmat jo gunehgaar ke saath
Raat din bhej salaam un pe Malaik ki tarah
Parh darood un pe ghulaman-e-wafadar ke saath