Hum Madeene Se Allah Kyun Aa Gaye

Hum Madeene se Allah kyun aa gaye qalb hairan ki taskeen wahi reh gayi

Dil wahi reh gaya jaan wahi reh gayi kham usi dar pe apni jabeen reh gayi

Yaad aate hain hum ko woh shaam o sehar woh sukoon-e-dil jaan o rooh o nazar

Yeh unhi ka karam hai unhi ki ata aik kifiat-e-dilnasheen reh gayi

Allah Allah wahan ka durood-o-salaam Allah Allah wahan ka sujood-o-qayam

Allah Allah wahan ka kaif-e-dawam woh salat-e-sukoon aafreen reh gayi

Jis jagah sajda rezi ki lazzat mili jis jagah har qadam un ki rehmat mili

Jis jagah noor rehta hai shaam o sehar woh falak reh gaya woh zameen reh gayi

Parh ke Nasrun Min Allahi Wa Fathun Qareeb hum rawan jab hue soye kooye Habeeb

Barkatein rehmatain saath chalne lagein bebasi zindagi ki yahin reh gayi

Zindagani wahin kaash! hoti basar kaash! Behzad aate na hum laut kar

Aur poori hui har tamanna magar yeh tamanna-e-qalb hazein reh gayi