Hum Banawat Say Nahi Kehtay Ke Hum Teray Hain

Hum banawat say nahi kehtay ke hum teray hain

Hum teray dar ki uthate hain qasam, teray hain

Choom kar jin ko milay kaif o suroor o masti

Kaisay taseer-i-rasa naqsh-i-qadam teray hain

Gham-i-duniya kabhi pehlay, na ab hoga kabhi

Shukr-i-ezad! ke meray seene mein gham teray hain

Hon Abu Bakr o Umar, ya ke hon Usman o Ali

Sayray tabinda yeh ashab-i-hasham teray hain

Khauf kya pyaas ki shiddat ka b roz-i-mahshar

Hum ke parwarda o asuda-i-yam teray hain

Tu gadayan-i-Muhammad ﷺ ka gada hai Arsal

Bas isi wastay duniya mein bharam teray hain