Har Soo Rawaan Hawaaye Khumaar-e Tarab Hai Aaj
Har Soo Rawaan Hawaaye Khumaar-e Tarab Hai Aaj
Har soo rawaan hawaaye khumaar-e tarab hai aaj
Baab-e-qubool wa hai muraadon ki shab hai aaj
Dil mein khushi saroor nazar mein ajab hai aaj
Saqi mujhe na chhed ke teerah Rajab hai aaj
Rukh se naqaab utha ke naveed-e-zuhoor de
Haazir hai dil ka jaam, sharaab-e-tohoor de
Woh mai pila ke jis se tabeeyat hari rahe
Nas nas mein anima ki subuhi bhari rahe
Qaaim sada jahaan mein teri dilbari rahe
Aankhon ke saamne yeh suraahi dhari rahe
Jo baadah kush wala ka nasha kal pe taal de
Lalla apni bazm se us ko nikaal de
Woh mai pila ke jis mein nabuwat ki boo mile
Jis ke nashe mein husn-e-imaamat ki kho mile
Aadam ko jis se khoi hui aabroo mile
Main bhi piun to mujh ko khuda roobaro mile
Woh mai ke jis mein subh-e-azal ka saroor ho
Woh mai ke jis mein aal-e-Muhammad ﷺ ka noor ho
Woh mai jo Mustafa ne kisa mein chhupa ke pi
Aur Fatima ۖ ne apni haya mein mila ke pi
Hasneen o Murtaza ne jo mehfil saja ke pi
Jibraeel ne falak se zameen par jo aake pi
Jis ka nasha nijaat ka samaan ho gaya
Salmaan pi ke fakhar-e-Sulaiman ho gaya
Eesa ne pi to us ko masihai mil gayi
Moosa ko apne Rab ki shenaasai mil gayi
Dawood ۖ ko bhi taqat-e-goyaai mil gayi
Yaqub ۖ ne jo pi, use bainaai mil gayi
Woh mai ke jiska kaif dilon mein utar gaya
Yusuf ne pi to chaand sa mukhaara nikhar gaya
Qeemat mein khald se bhi jo bartar hai woh sharaab
Jis ka nasha namaaz se behtar hai woh sharaab
Jo husn-e-khudo khaal-e-Payambar ﷺ hai woh sharaab
Jo mad'aa-e-Qanbar o Bozar hai woh sharaab
Jis ka saroor fikr-e-bashar ka ghuroor hai
Jis ke nashe ki mauj sar-e-koh-e-Toor hai
Woh mai ke jis se dil ko shaoor-e-bashar mile
Jis ke bas ek ghont se jannat mein ghar mile
Jis ke nashe mein shehar-e-nubuwwat ka dar mile
Jis ke sabab dilon ka dua ko asar mile
Ek rand kainaat mein bebak ho gaya
Bahlol pi ke saahib-e-idraak ho gaya
Woh mai pila ke toot ke jis par mulk paren
Jis ke nashe ke rang udayen arsh tak paren
Randon pe awliyaa ke zamane ko shak paren
Aaye munaafiqon mein to saagar chhalak paren
Kankar pe jis ki chheent bhi par jaaye dur kare
Woh mai jo aasiyon ko bhi ek pal mein har kare
Jis ka saroor zaamin-e-jannat hai woh sharaab
Jo waaqif-e-mizaj-e-shari'at hai woh sharaab
Jo ramz "kal kafa" ki haqeeqat hai woh sharaab
Jis ka khumaar ajr-e-risalat hai woh sharaab
Aisi pila ke saara jahaan dolne lage
Nok-e-sanaan pe jis ka nasha bolne lage
Jis ki nazeer mil na sake shash jahaath mein
Tere siwa kahin na mile kainaat mein
Bhar de abad ka rang bashar ki hayat mein
Woh mai jo aftaab ugaltI hai raat mein
Woh mai jo hai ghilaaf-e-haram mein chhanni hui
Jo arsh par hai dast-e-Khuda se bani hui
Randon ko aaj zid hai teri dilbari khule
Raaz-e-junoon o ghayaat-e-shola siri khule
Yeh kya ke mai kade ka fasaun sarsari khule
Ek dar na khol, aaj to baarah dari khule
Talchat na de ke rang yeh khald o adan ke hain
Adna se hain ghulam magar panjtan ke hain
Main chahta hoon aaj naya ehtemaam ho
Yaseen ki sharaab ho Taha ka jaam ho
Phoote sehar dilon mein to aankhon mein shaam ho
Har rand ke labon pe khuda ka kalaam ho
Har dil se aaj bighz ka kaanta nikaal de
Bakh bakh kare koi to jahannam mein daal de
Saagar mein hil aati hai karan ghol ke pila
Sar par lawaye hamd-e-Khuda khol ke pila
Chup chup sa kyun hai aaj to hans bol ke pila
Randon ka zarf poori tarah tol ke pila
Saagar mein aaj itni muqaddas sharaab ho
Pi len gunaahgar to haj ka sawaab ho
Saagar utha ke chhayi ghata jhoom jhoom ke
Aayi hawa Najaf ke dareechon ko choom ke
Saqi hareem-e-dil mein munawwar nujoom kar
Randon ko waaqif-e-dar-e-baab-e-uloom kar
Hum ko pila wohi jo wala ki sharaab ho
Kam zarf baadah khwaar ka khaana kharaab ho
Khol aisa mai kade jo haram se bhi kam na ho
Jis ki hudood pe bandish-e-lauh o qalam na ho
Jis mein munaafiqat ka fasaun mohtaram na ho
Saagar turab ka ho koi jaam-e-jam na ho
Hamrah to rahe to koi ranj o gham nahin
Warna tere faqeer Sikandar se kam nahin
Saqi to mil gaya to gham-e-jaan ki rat tuli
Ghunche nikhar gaye hain khuli hai kali kali
Mehki hui hai shehar-e-tasawwur ki har gali
Woh dekh saj raha hai zachcha khana-e-Ali
Masroof-e-ehtemaam Zabiih o Khalil hain
Jaarob kush ke roop mein woh Jibraeel hain
Hooron ke gaesoon se maslay bane hue
Phir un pe kahkashaan ke sitare chune hue
Mauj-e-durud mein woh malik sar dhne hue
Pehle nahin yeh geet kisi ke sune hue
Rutbah mila woh mehfil-e-sidrah jabeen ko
Jhuk jhuk ke aasman ne dekha zameen ko
Aadam bichha raha hai duaaon ki chaandni
Ayoob apne sabr se karta hai roshni
Hai aabdar Noah sa insaan ka najee
Aaya hai Khizr saath liye khums-e-zindagi
Yaqub bhi hai aankh ki masti liye hue
Yusuf hai saath mashal-e-hasti liye hue
Har soo rada-e-abr-e-karam hai tani hui
Zuroun ki aftaab-e-falak se thani hui
Shabnam baras rahi hai shafaq mein chhanni hui
Makkah ki sarzameen hai mu'alla bani hui
Aati hai kaun dekhne is ehtemaam ko
Jhukne lagi hain Maryam o Hawwa salaam ko
Aaye hain behar-e-deen sawa lakh ambiya
Awwal Abu al-Bashar hain to aakhir hain Mustafa
Ik simt ambiya hain to ik simt awliyaa
Dono ke darmiyan hai Umraan ۖ ka qaafila
Bilqis ik taraf ho, Sulaimaan khyaal kar
Bint-e-Asad chali hai rida ko sambhaal kar
Woh ambiya ka qaafila ek dam thehar gaya
Har soo hai shor-e-salamha ward-e-marhaba
Sab se alag khade hain woh sardar-e-ambiya
Bint-e-Asad chali hai soye khaana-e-Khuda
Saa'at yahi hai shaahid-e-haq ke shuhood ki
Zuroun se aa rahi hai sadaaye durud ki
Bint-e-Asad chali yeh sadaaye liye hue
Honton pe ba-wuqaar duaaen liye hue
Aankhon mein aooj-e-haq ki razaaye liye hue
Qadmon mein ambiya ki adaaye liye hue
Chehre pe aks-e-mauj-e-adab ka saroor hai
Pehlu mein un ki pehli imaamat ka noor hai
Lekin dar-e-haram to muqaffal hai is ghadi
Bint-e-Asad yeh dekh ke wapas palat pari
Nazil hui falak se woh ilhaam ki ladi
Aayi sada “na ja gul-e-ismat ki pankhri”
Deewar dar bane ke zamane mein dhoom ho
Zahir kamal-e-maadar-e-baab-e-ulum ho
Saqi na chhed hai yahi aaghaaz-e-imtihaan
Dhadkan zameen ki chup hai to saakit hai aasmaan
Khamosh aye qayamat-e-hangama-e-jahaan
Ka'bah mein ja rahi hai woh ek but shikan ki maan
Quran-e-bandagi ki tilawat ka waqt hai
Jaago tulu-e-shams-e-imamat ka waqt hai
Jaag aye zameer jaag ke jaage hain tere bhaag
Taar-e-nafs ko chhed ke chheda hua ne raag
Khush ho gayi zameen ke use mil gaya suhaag
Saqi sharaab la ke bujhe tashnagi ki aag
Zulmat-e-do jahan ki rida chaak ho gayi
Naazil huye Ali to fiza paak ho gayi
Bint-e-Asad ki god se ubhra ek aftaab
Haan aye turab tujh ko mubarak ho boo turab
Kausar, chhilak zara, tera saaqi hai lajawab
Batha ki sarzameen salaamat yeh inqilaab
Imraan jhoomte hain ke Zahra jabeen to hai
Ab khush hain Mustafa ke koi jaanasheen to hai
Adam hai khush ke us ki dua ko asar mila
Eesa hai raqs mein ke koi chaara gar mila
Ayoob ko bhi qabar ka sheereen samar mila
Yusuf ko apne husn ka paighaam bar mila
Masroor hai fiza koi mahshar bapa na ho
Sahme hue hain but ke haqiqi Khuda na ho
Tarteeb-e-khaal o khud se numaayaan hai bartari
Paikar ke bankpan pe nichhawar dilaawari
Chehre pe woh sukoon ke nazaan payambari
Aankhon mein woh ghuroor ke hairaan hai daawari
Aayi hai ek baat hi ab tak qiyaas mein
Khushboo hai daawari ki bashar ke libaas mein
Saqi sharaab la ke tabeeyat michal gayi
Laghzish mere shaoor ki masti mein dhal gayi
Nabz-e-qalam behkne lagi thi sambhal gayi
Rangeeniyon ko dekh ke niyat badal gayi
Tujh par rumooz-e-ronaq-e-hasti ayyan karun
Kuch pi ke mad'hat-e-shah-e-duraan bayan karun
Mola Ali shaoor-e-bashar fikr-e-arjamand
Daali hai jis ki soch ne aflak par kamand
Woh jis ka martaba bani Adam se hai buland
Chhidka hai jis ne maut ke chehre pe zehr-khand
Jo nuqta-e-urooj-e-furoo' o usool tha
Bistar pe so gaya to mukammal Rasul tha
Aisa kareem jis ke karam ki na had mile
Aisa aleem ilm ko jis se madad mile
Aisa azeem jis ki ada mein Ahad mile
Aisa saleem jis mein shaoor-e-Samad mile
Duniya o deen mein jis ko woh naam o nasab mila
Khaliq ki baargah se Haider laqab mila
Kashwar kushaye fikr-e-shuja'at ka bankpan
Saaber, sakhi, kareem, rida jo, woh but shikan
Naan-e-jou ka naaz qana'at ki anjuman
Dil ka saroor jurrat o ehsas ki phaban
Jis ka wujud qudrat-e-haq ki daleel tha
Jis ka shaoor bosa gah-e-Jibraeel tha
Khyber kasha, yaqeen ka paikar woh boo turab
Tareekh ki jabeen woh fath-e-mubeen ka baab
Sarchashma-e-nijaat-e-bashar jis ka iztirab
Jis ke wujud se hai rukh-e-deen ki aab o taab
Jis ka karam jahaan ke liye aam ho gaya
Khatron ko odh kar jo sar-e-shaam so gaya
Woh jis ke farq-e-naaz pe kaj tha baqa ka taaj
Woh booturab, shams o qamar se jo le khiraaj
Woh khalq, iqtidaar o sakhawat ka imtizaj
Jis ne zameen pe reh ke falak par kiya tha raaj
Sultani-e-behesht-e-bareen ki naveed li
Ek zarb se jahaan ki ibaadat khareed li
Woh deen ki saltanat mein sharaafat ka taajdar
Woh mazhar-e-jalaal-e-Khudawand-e-rozgaar
Woh boriya nasheen woh shah-e-kahkashaan sawar
Woh banda-e-Khuda woh khudaai ka iftikhaar
Jis ke qalam ki nok balaghat ki raah thi
Jis ke ilm ki chhaon risalat panaah thi
Jis ne hawa ki zad pe munawwar kiye chiraagh
Jis ke yaqeen ne tod diye jahil ke eyaagh
Jis ne behm kiye the rumooz-e-dil o dimagh
Woh phool jis se tab'at-e-risalat thi baagh baagh
Jis ke lahoo se chehra-e-hasti nikhar gaya
Woh naqsh jo dilon ki tahon mein utar gaya