Har Roz Shab-e-Tanhai Mein Furqat Ka Junoon Tadpata Hai

Har roz shab-e-tanhai mein furqat ka junoon tadpata hai

Dil majboori par rota hai jab yaad Madina aata hai

Sajdon ki kamai aik taraf taiba ki gaddai aik taraf

Har cheez usse mil jati hai jo dar pe nabi ke jata hai

Ek ho k uthi mere seene se aaye paighaam Madine se

Chal uth sarkar ﷺ bulate hain khush bakht bulaya jata hai

Mera zarf kahan teri zaat kahan, meri fikr kahan teri baat kahan

Adna sa aik sana khwaan hun yahi nisbat hai yahi nata hai

Ho khair tere mekhane ki har maikash har paimane ki

Saqi teri mast nigahon se har paimana bhar jata hai

Teri madhat kaam Zahooree ka tere naam se naam Zahooree ka

Qarya qarya, basti basti jo teri naat sunata hai