Hai Kalaam-e Ilahi Mein Shams O Zuhaa Tere Chehra-e Noor-fizaa Ki Qasam

Hai kalaam-e Ilahi mein shams o zuhaa tere chehra-e noor-fizaa ki qasam

Qasam-e shab-e taar mein raaz yeh tha ke Habeeb ki zulf-e do-taa ki qasam

Tere khulq ko Haqq ne azeem kaha teri khalq ko Haqq ne jameel kiya

Koi tujh sa hua hai na ho ga shaha tere Khaaliq-e husn o adaa ki qasam

Woh Khuda ne hai martaba tujh ko diya na kisi ko mile na kisi ko mila

Ke kalaam-e majeed ne khai shaha tere shehr o kalaam o baqaa ki qasam

Tera masnad-e naaz hai Arsh-e bareen tera mehrem-e raaz hai rooh-e ameen

Tu hi Sarwar-e har do jahan hai shaha tera misl nahi hai Khuda ki qasam

Yahi arz hai Khaaliq-e arz o samaa woh Rasool hain tere, main banda tera

Mujhe un ke jawar mein de woh jagah ke hai khuld ko jis ki safa ki qasam

Tu hi bandon pe karta hai lutf o ata hai tujhi pe bharosa tujhi se dua

Mujhe jalwa-e paak-e Rasool dikha tujhe apne hi izz o 'alaa ki qasam

Mere garchay gunaah hain had se siwaa magar un se umeed hai tujh se rajaa

Tu Raheem hai un ka karam hai gawaah woh Kareem hain teri ata ki qasam

Yahi kehti hai bulbul-e baagh-e jinaan ke Raza ki tarah koi sehr bayaan

Nahin Hind mein wasif-e Shaah-e Huda mujhe shokhi-e tab’a-e Raza ki qasam