Faza Muattar, Khala Munawwar, Sama Hai Masroof-e Kajkalahi
Faza Muattar, Khala Munawwar, Sama Hai Masroof-e Kajkalahi
Faza muattar, khala munawwar, sama hai masroof-e kajkalahi
Zameen ke anchal ki har shikan mein simat rahi hai jahan panahi
Hajr shajar mast o mehve naghma, bashar bashar wafq-e khush nigahi
Ghta hai mashghool-e aks bundi ke raqs karte hain murgh o mahi
Mizaaj-e gulbang-e aql chonke, darood ki jaltarang jage
Hawa rag-e jaan ko chhedti hai, Ali Wali ka malang jage
Woh phool mehke woh rang dehke tayur chehke to mast behke
Kali jo chutki hawa ko khatki chaman se atki ke shakh mehke
Hayat lipti palak na jhapki hazar jalwon ke paas reh ke
Ghta se chhan kar faza mein tan kar woh chand nikla yeh baat keh ke
Mujhe na roko ke ban sunwar kar hazar mahshar jaga raha hoon
Hai jis ke ulfat ka daag dil mein usi ki shadi mein ja raha hoon
Wajood un ka mera taaruf, yeh meri pehchaan hain jahan mein
Inhi ke dum se yeh roshni hai yeh surat-e jaan hain jahan mein
Inhe bana ke mein surkhru hoon yeh mera irfan hain jahan mein
Daleel-e imaan poochte ho yahi to imaan hain jahan mein
Inhi ki khilqat se hai yeh khalqat na jagte yeh jahan sota
Inhi ki khatir banai duniya jo yeh na hote to kuch na hota
Inhi ki chashm-e karam se bigrhe huye muqaddar sanbhal gaye hain
Kabhi mein in se bahl gaya hoon kabhi yeh mujh se bahl gaye hain
Meri raza ke azeem tajir mere irade badal gaye hain
Falak pe ik the zameen pe aakar yeh paanch bahron mein dhal gaye hain
Inhi mein do bahr mil rahe hain tamam alam hai shad mera
Ke in mein ek lakht-e Mustafa hai to doosra khana zad mera
Zameen-e Batha misaal-e jannat aroos-e alam bani hui hai
Usool deen ke satoon hain muhkam haya ki chadar tani hui hai
Har ek zarrey ki aasmaanon se aaj ki shab thani hui hai
Kiran kiran ik hareer-e ismat ke anchalon mein chhani hui hai
Ladi hui hai hina ki kaliyon se aaj tooba ki dali dali
Ali ki khatir Nabi ke dar par hai aaj tauheed khud sawali
Idhar falak par hareem wahdat mein noor ka saaybaan saja hai
Sabhi farishte talab hue hain har ek noori jhuka khada hai
Idhar se shams o nujoom o sayyaraga'n ka bhi qafila chala hai
Suno suno kaun nooriyon ko khuda ka paighaam de raha hai
Woh kaun khushbakht hai ke us dam hamari rehmat ko aazmaye
Ali ki shadi ka nama bar ban ke jo dar-e Mustafa pe jaye
Yeh hukum sun kar badhe farishte ke apni qismat ko aazmaen
Sarhon pe dastar-e zuhud rakhi durust hone lagen kabein
Huzoor-e wahdat thark rahi hain gale mein sehmi hui sadaen
Idhar se Jibrail is taraf shams le ke aaye kayi duaen
To kaun? Jibrail, ek taraf ho naye pyami ko bhejna hai
Janab sooraj hoon, ek taraf ho tujhe salami ko bhejna hai
Sada yeh aai kahan hai Zohrah ke aaj Zohra ke dar pe jaye
Hamara paighaam intehai adab se ja ke unhe sunae
Na dastken de na aahatein ho na be adab ho na muskrae
Bas is tarah jaye jaise momin khud apne Khaliq ke dar pe aaye
Nabi ki chaukhat pe bosa de kar kahe ke ab yeh usool hoga
Jo sar se paon talak khuda jaisa ho woh zauja Batool hoga
Falak se Zohra utr raha hai ke jaise ilham dil mein aaye
Ke jaise ek be riya namazi bari aqeedat se haj ko jaye
Badan pe odhe quba-e ismat labon pe sall ala sajaye
Woh ja raha hai ke jaise qari ghilaf-e Quran pe sar jhukae
Nasha moudat ki mae ka Zohra ke dil mein shayad sama gaya hai
Woh ja raha hai woh aa raha hai darood padh lo woh aa gaya hai
Yeh anbiya hain yeh auliya hain Ali Wali ki barat dekho
Khizar chhidakata hai har barai ke rukh pe aab-e hayat dekho
Nashe ke alam mein jhoomti hai shaour ki kainat dekho
Yeh bazm dekho yeh log dekho yeh rang dekho yeh raat dekho
Kayi baharen guzar gayi hain khula na aisa chaman jahan mein
Kahan Khudai mein aisa nosha kahan hai aisi dulhan jahan mein
Lo ho chuka aqd-e Murtaza ka kaho ke sall e ala mubarak
Ali Wali ko Nabi ke ghar mein mila hai jo rutba mubarak
Tamam nabi'o ko aaj ki shab mila hai mushkil kusha mubarak
Imam apna humein salamat Nasirio ko Khuda mubarak
Khuda ka deen barwar hua hai chaman imamat ka khil utha hai
Janab-e Imran ko nabuwat ki parwarish ka sila mila hai