Diloon Ki Teh Mein Posheeda Mohabbat Dekhne Wala

Diloon ki teh mein posheeda mohabbat dekhne wala

Woh Mahboob-e-Khuda jazbon ki wusat dekhne wala

Wohi hai sunne wala an kahe alfaaz chahat ke

Wohi hai an likhe harf-e-iradat dekhne wala

Hua hai kon juz Mola-e-Salman o Bilal ab tak

Bajaye husn-e-soorat, noor-e-seerat dekhne wala

Makan o la-makaan ki shaukaten zeere qadam us ke

Woh maujood o adam ki har wilayat dekhne wala

Na jhapki aankh jis ki roo-baroo-e-jalwa bari

Sar-e-Qausain zaat-e-Rabb-e-Izzat dekhne wala

Shebistan-e-Hira kyun kar na banta markaz-e-irfan

Ke hai pehle pehal noor-e-nubuwat dekhne wala

Rasool Allah ki ulfat se har dil mein ujala hai

Zamane mein hai ye rang-e-aqeedat dekhne wala