Dilon Ke Sath Jabeenein Jo Kham Nahi Karte

dilon ke sath jabeenein jo kham nahi karte

woh paas-e-maddhat-e-Khair Ul Umam ﷺ nahi karte

dua baghair, ijazat baghair, izn baghair

hum aik lafz supurd-e-qalam nahi karte

kitaab-e-haq ne jinhein Mustafa ﷺ qarar diya

juz un ke aur koi zikr hum nahi karte

Kareem aise ke inaam karte jaate hain

Jawaad aise ke ni'mat ko kam nahi karte

jo un ke jada-e-rahmat se munharif ho jaayein

zamane un ko kabhi mohtarim nahi karte

miyasir aati hai jin ko durood ki taufiq

kisi bhi haal mein hon koi gham nahi karte

nazar mein Taif o Makkah rahein to un ke ghulaam

jawab mein bhi sitam ke, sitam nahi karte