Dil O Nazar Mein Liye Ishq-e-Mustafaؐ Aao

Dil o nazar mein liye ishq-e-Mustafaؐ aao

Khayaal o fikr ki sarhad se ma'wara aao

Dar-e-Rasoolؐ se aati hai mujh ko ye awaaz

Yahan mile gi tumhain daulat-e-baqa aao

Jalaaye rehti hai isyaan ki aag Mahshar mein

Bas ab na der karo shafi' ul wura aao

Barang-e-naghma-e-bulbul suna ke naat-e-nabiؐ

Zara chaman mein shagufto ka munh dhula aao

Baras rahi hain chaman par ghataayen wahshat ki

Bhatak raha hai baharon ka qafila aao

Faraaz-e-arsh se mere Huzoorؐ ko sagharؔ

Mila ye hukm ke na'lain zeere pa aao