Dil Mein Utartay Harf Se Mujh Ko Mila Pata Tera

Dil mein utartay harf se mujh ko mila pata tera

Mo'jiza husn-e-saut ka, zamzama-e-sada tera

Mera kamaal-e-fann, tere husn-e-kalaam ka ghulaam

Baat thi jaan-fiza teri, lehja tha dilruba tera

Jaan teri sar ba sar jamaal! Dil tera, aaeena misaal

Tujh ko tere adoo ne bhi dekha to ho gaya tera

Ae mere Shaah-e-Sharq o Gharb! Naan-e-jooyn ghiza teri

Ae mere boriya nasheen! Saara jahaan gada tera

Sang-zanon mein ghir ke bhi, tu ne unhein duaa hi di

Dasht-e-balaa se baar-haa, guzra hai qaafila tera

Mera to kaainaat mein, tere siwa koi nahi

Arz teri, samaa tere, banday tere, Khuda tera