De Tabassum Ki Khairaat Mahaul Ko
De Tabassum Ki Khairaat Mahaul Ko
De tabassum ki khairaat mahaul ko
Hum ko darkaar hai roshni ya Nabi ﷺ
Ek sheereen jhalak, ek noorain dhalak
Talkh o tareek hai zindagi ya Nabi ﷺ
Ae naveed-e-Masihā teri qaum ka haal
Eesa (A.S) ki bheeron se abtar hua
Us ke kamzor aur be-hunar haath se
Cheen li charkh ne bartari ya Nabi ﷺ
Kaam hum ne rakha sirf azkaar se
Teri taleem apnaayi aghyaar ne
Hashr mein munh dikhayenge kaise tujhe
Hum se nakardah kaar Ummati ya Nabi ﷺ
Dushman-e-jaan hua mera apna lahoo
Mere andar adoo, mere baahir adadoo
Maajra-e-tahayyur hai pursidani
Soorat-e-haal hai deedani ya Nabi ﷺ
Rooh veeraan hai, aankh hairaan hai
Ek buhran tha, ek buhran hai
Gulshanon, shehron, qariyon pe hai
Parfishaan ek gambheer afsurdgi ya Nabi ﷺ
Sach mere daur mein jurm hai, aib hai
Jhoot fun-e-azeem aaj la raib hai
Ek a'izaaz hai jahl o be-rah rawi
Ek aazaar hai aagahi ya Nabi ﷺ
Raazdaan is jahan mein banao kise
Rooh ke zakhm jaa kar dikhao kise
Ghair ke saamne kyun tamaasha banoon
Kyun karoon doston ko dukhi ya Nabi ﷺ
Zeest ke tapte sehra pe Shaah-e-Arab ﷺ
Tere ikraam ka abr barsega kab
Kab hari hogi shaakh-e-tamanna meri
Kab mitegi meri tishnagi ya Nabi ﷺ
Ya Nabi ﷺ ab to aashoob-e-haalaat ne
Teri yaadon ke chehre bhi dhundhla diye
Dekh le tere Taib ki naghma gari
Banti jaati hai noha gari ya Nabi ﷺ