Daroon-e-kaaba Hua Hai Logo Zahoor Jis Ka Ali Ali Hai

daroon-e-Kaaba hua hai logo zahoor jis ka Ali Ali hai

jo aankh kholi to sab se pehle Nabiؐ ko dekha Ali Ali hai

hai shahr-e-ilm-e-Nabiؐ ka rasta dar-e-Ali se jo ho ke guzre

tabhi to ilm-e-Nabiؐ ke pyason ke lab pe naara Ali Ali hai

Nabiؐ ne Haidarؓ ka haath thaame Ghadir-e-Khum par jo keh diya tha

ke jis bhi momin ka main hoon Moula, usi ka Moula Ali Ali hai

woh raat hijrat ki pur khatar thi ke har taraf tha adu ka pehra

ajal ki aankhon mein aankh daale sukoon se leeta Ali Ali hai

nizam-e-fitrati badal gaya tha jo asr unki qaza hui thi

ke jin ki khatir woh dooba suraj palat ke aaya Ali Ali hai

har ek sahabi ko dosray ka banaya bhai mere Nabiؐ ne

to do jahan mein agar kisi ko akhi banaya Ali Ali hai

na todh paaya tha jis ko lashkar jahan ne dekha woh bab-e-Khyber

woh ek panje ke zor se hi ukhaar phenka Ali Ali hai

ghuroor o nakhwat mein dooba Marhab jo aagaya tha tere muqabil

woh jis ne is pur ghuroor ka sab ghuroor toda Ali Ali hai

mera ta'aruf bhi abd-e-Wudd hai so main laroon ga faqat Ali se

charhay jo seene pe us ke Haidarؓ samajh mein aaya Ali Ali hai

maratib unke jaleel apni samajh mein aayein to kaise aayein

Nabi-e-Rehmat ki shafqaton ne jinhe hai paala Ali Ali hai