Chand Uljha Hai Khajuron Ki Ghani Shaakhon Mein
Chand Uljha Hai Khajuron Ki Ghani Shaakhon Mein
Chand uljha hai khajuron ki ghani shaakhon mein
Chandni jhoolte saayon mein bhatak jaati hai
Jaise baloor ki tooti hui rangeen choori!
Gesu-e-yaar ke peechon mein atak jaati hai
Raat dhalkaye sitaron se murassa aanchal
Khole baithi hai junoon bakhsh si shehla aankhein
Aur har saans se insaan ko sada deti hai
Aa meri god mein aa neend se behla aankhein
Ho chuki khatam woh taqreeb-e-haya soze-uqaz
Sochuke jaam bujhe aatish-e-sayal ke kham
Raqs e Iblees ka na paak tasalsul toota
Arz-e-Kaaba hai magar ek ajab soch mein gum
Meri taqdees ki tareekh kahan kho gayi
Meri taqdeer mein sadiyon se hain shetan ke juloos
Meri aaghosh hai maloon buton se bojhal!
Rabb-e-Kaaba kabhi to ne bhi kya hai mehsoos
Aur isi waqt idhar Ghar-e-Hira mein koi
Hai usi fikr mein insaan ko mile kaise najaat
Jis ki qismat mein idhar Qaisar o Kisra ka azaab
Apne haathon se tarashe hain idhar Laat o Manaat
Jab bhi bajti hai koi dard ki zanjeer kahin
Dil-e-Ahmed mein bhi toofan dharak uthte hain
Zinda dargoor jo ho jaati hai koi bachi!
Uske har ang mein sholay se bhadak uthte hain
Phir Muhammadﷺ ke Khuda ne koi takheer na ki
So gayi raat shafaq taab savere aaye
Phir baharon ki jabeen aa ke zameen boos hui
Sehan-e-Kaaba mein woh zulfon ko bikhere aaye