Bargah-e-paak Mein Pohnche Sana Karte Hue

Bargah-e-Paak mein pohnche sana karte hue

Mudda paya hai arz-e-mudda karte hue

Be niyaaz-e-ni'mat-e-kown o makaan hote gaye

Koocha Sultan-e- Aalam mein sada karte hue

Deeda o dil mein gul-e-jalwa simat'te hain kahaan

Kab yeh soorat samne thi iltija karte hue

Kab mujhe thi jaan ki parwa, kab mujhe tha sar ka hosh

Sajda-e-shukar unki masjid mein ada karte hue

Koi ane jane wala har ghari nazron mein tha

Khoye youn nazara-e-Ghaar-e-Hira karte hue

Log chamkate chale jayeinge apne roz o shab

Uswa Sarkar se kasb-e-zia karte hue

Ramz-e-hasti, raaz-e-fitrat, sir zaat o kainat

Har khabar payi talash-e-Mus'tafa karte hue

Iltifaat-e-Syed-e-Saadaat kab mehdood hai

Wus'at-e-daaman bhi dete hain ata karte hue

Thaam kar daaman ko unke be-mahaba ro diya

Main ke ghabrata tha unka saamna karte hue