Ameer-e-Adl, Tamanna-e-Haq, Duaa-e-Rasoolؐ
Ameer-e-Adl, Tamanna-e-Haq, Duaa-e-Rasoolؐ
Ameer-e-Adl, tamanna-e-Haq, duaa-e-Rasoolؐ
Teri hayat, baraye Khuda baraye Rasoolؐ
Shahaab-e-Haq kahoon ya deen ki uthaan kahoon
Tujhe zameen-e-farasat ka aasmaan kahoon
Na sirf apne hi, qail hain ghair bhi tere
Hain naafiz aaj bhi qanoon-e-askari tere
Padhi namaz dileri se tu ne Kaabe me
Lagayi Haq ki sada kufr ke ehate me
Har ek jang me tu Mustafaؐ ke sath raha
Hamesha tegh ke daste pe tera hath raha
Liye raha Haq o insaaf ki tarazu ko
Hila saki koi taaqat na tere baazu ko
Gharoor-e-Qaiser o Kisra ko khaak tu ne kiya
Buland paaya chatano ko chaak tu ne kiya
Usul-e-"Waqf" teri di hui zameen se bana
Tere waqar ka gunbad satoon-e-deen se bana
Jalaye tu ne dar-e-Shah-e-Do Jahan ke 'diye
Baseeraton ne teri bol bhi azaan ke diye
Tera ghulam hi pehla shaheed kehlaya
Ghulam hi ne tujhe zer-e-gor pohunchaya
Nabi ke baad bhi koi Nabi agar hota
Baqol-e-Khatm-e-Rusl tu hi ae Umar hota