Ali, Jamaal-e-Do Aalam Ali Imam-e-Zaman
Ali, Jamaal-e-Do Aalam Ali Imam-e-Zaman
Ali, jamaal-e-do aalam Ali imam-e-zaman
Ali (a.s.), waqar-e-dil-o-jaan, Ali (a.s.) bahaar-e-chaman
Ali (a.s.), urooj-e-fasaahat, Ali (a.s.) kamaal-e-sukhan
Ali arab ke andheron mein haq ki pehli karan
Ali (a.s.) wali se guraizaan na ho Khuda ke liye
Ali to quwwat-e-baazoo hai Mustafa (s.a.w.) ke liye
Ali (a.s.) ka nutq, ‘Salooni’ ke aabshaar ki zauw
Ali (a.s.) ka husn, meh o mehr mein hayaat ki rau
Ali hanse to phate do jahan mein subah ki pau
Ali jo chup ho to ruk jaaye nabz-e-aalam-e-nau
Ali (a.s.) ruke to nava khamoshi mein dhalti hai
Ali (a.s.) chale to zamane ki saans chalti hai
Ali (a.s.) ka fikr, sha'oor-e-hayaat-e-nau ki asas
Ali (a.s.) ka faqr, jahan mein toongri ka libas
Ali (a.s.) ka ilm, dil-e-aagahi, shikast, qiyaas
Ali (a.s.) ka hilm, karam gustari mein adal shanaas
Bhatak rahe ho kahan aaqibat gari ke liye?
Ali (a.s.) ka naam hi kaafi hai rahbari ke liye
Ali (a.s.) zameer-e-junoon, meer-e-kaarwaan-e-khirad
Ali (a.s.) sha'oor-e-imamat, Ali (a.s.) ghuroor-e-Samad
Ali (a.s.) ameen-e-rumooz-e-Rasool (s.a.w.) o fikr-e-ahad
Ali (a.s.), dilair, bahaadur, sakhi, karim, Asad
Ali (a.s.) ke zikr se jannat wusool hoti hai
Baghair is ke dua kab qubool hoti hai
Ali hai manzil-e-idaark o aagahi ka nishaan
Ali hai ronak-e-hangaama-e-zamaaan o makaan
Ali (a.s.) ke dam se damaadam rawaan dawaan yeh jahan
Ali (a.s.) ke dast-e-karam ki karan karaa beh karaa
Agar najaat ke taalib ho tum abad ke liye
Kabhi pukaar ke dekho use madad ke liye