Aisa Koi Mehboob Na Ho Ga Na Kahin Hai

Aisa koi mehboob na ho ga na kahin hai

Baitha hai chatai pe magar arsh nasheen hai

Milta nahin kya kya do jahan ko tere dar se

Ek lafz "nahin" hai ke tere lab pe nahin hai

Tu chahe to har shab ho misaal shab e isra

Tere liye woh char qadam arsh e bareen hai

Har ek ko mayassar kahan us dar ki ghulami

Us dar ka to darbaan bhi Jibraeel ameen hai

Rukte hain yahan aa ke qadam ehl e nazar ke

Is kooche se aage na zamaan hai na zameen hai

Ae shah e zaman ab to ziarat ka sharaf de

Be chain hain aankhein meri, be tab jabeen hai

Dil girya kanan aur nazar soo e madina

Azam tera andaaz e talab kitna haseen hai